طبعا كلنا بننزل الجيم وتقريبا بردو كلنا بنتمرن كويس وبنتعب جامد في التمرين بس بناكل أي حاجة قبل التمرين وأي حاجة بعد التمرين وللأسف مبنحصلش علي الجسم الـ كلنا نفسنا فيه بسبب الأكل، وطبعا بردو بنفضل نسأل عن أيه هي أفضل وجبة قبل التمرين وبعد التمرين.
إن شاء الله النهاردة هنتكلم عن أفضل أكل ممكن تأكله قبل وبعد التمرين وكله بروتين وموجود في البيت وأزاي تحضره.
1. أفضل أكل قبل التمرين:
قبل ما نتكلم عن الأكل لازم نعرف أمتي ناكل قبل التمرين....بيقولك يفضل الأكل قبل التمرين بساعتين إذا كانت الوجبة خفيفة، أو بعد ثلاث ساعات إذا كانت الوجبة كبيرة، ولو لعبت التمرينة قبل الوقت دا أو بعد الأكل مباشرة فقد تصاب بالتعب ولن تستفيد بالتمرينة وذلك لأن عملية الهضم تحتاج إلي ضخ دم إلي المعدة وممارسة التمارين الرياضية تحتاج إلي ضخ دم إلي العضلات وبذلك تكون غير مستفيد من التمرينة بشكل كافي وستصاب بالتعب والإجهاد.
ما هي مواصفات الأكل التي تأكلها قبل التمرين:
1. لابد أن تكون الوجبة تحتوي علي الكربوهيدرات (النشويات).
2. تحتوي على سكريات خفيفة.
3. تحتوي على نسبة من البروتين.
أمثلة لبعض الأكلات التي تحتوي علي تلك المواصفات:
1. البطاطا الحلوة: دي بقي مشكلة بجد يعني كويسة جدا جدا جدا هتخليك وحش وهتاكل الأوزان...ليه بقي؟؟ قولتلي ليه؟؟ علشان دي بتحتوي علي نسبة عالية جدا من الكربوهيدرات والسكريات، بجد أنا شخصيا بنصحكم بيها.
2. كوباية لبن وصباعين موز: يعني دي بردو وجبة متكاملة بس تعتبر من الوجبات الخفيفة الـ تلعب بعد ساعة من تناولها.
3. القهوة: ممكن تضربك كوباية قهوة قبل التمرين علشان الأبحاث بينت أن الكافيين يساعد في توليد الطاقة، فضلا عن إبطاء التعب وزيادة معدل حرق الدهون.
4. الحمص: أيوة بقي إنزل بالجديد، الحمص وجبة خفيفة فأكل 1/4 إلى 1/3 كوب من الحمص، مع بعض عصير الليمون سوف تعطيك حوالي 10 جرام من البروتين، و 30 جرام من الكربوهيدرات، وتقريبا 9 جرام من الألياف، يعني كويسة الوجبة الخفيفة قبل التمرين.
5. البيض: بص في ناس بتاكله قبل التمرين وفي ناس بتاكله بعد التمرين ومفيش مشكلة في الحالتين.
6. الخبر: تعرف إن العيش والرز والكلام دا ممكن تاكله قبل التمرين وهيمدك بالطاقة اللازمة لإنهاء التمرين دون تعب.
7. الشوفان: والله مش عارف اقولكم إيه علي الشوفان دا بجد أكله ممتازه جدا قبل وبعد الجيم.
8. يا جماعة في أكل ميتعدش بس خلاصة الكلام ممكن تبحث في جوجل عن أكتر أكلات تحتوي علي كربوهيدرات وتشوف الـ بتحبه ومتوفر بالنسبالك وتاكله.
2. أفضل أكل بعد التمرين:
ما هي مواصفات الأكل التي تأكلها بعد التمرين:
1. لابد أن تكون الوجبة تحتوي علي الكربوهيدرات (النشويات).
2. تحتوي على نسبة كبيرة من البروتينات، لتعويض الجهد المبذول أثناء التمرين.
أمثلة لبعض الأكلات التي تحتوي علي تلك المواصفات:
1. التونة: طبعا التونة دي بروتين صافي وزي الفل وأتكلمت في موضوع قبل كدة عن فوائد التونة .
اقرأ أيضاً: هل أكل التونة بشكل يومي أمن ام لا ؟
2. اللحمة: بص بقي أي لحم موجود تحت إيدك دوس وميهمكش.
3. البيض: بص والله في ناس بتقولك ملوش لازمة بس والله عن تجربة لواحد صاحبي مكنش بياكل غير بيض بعد التمرين وأوقات وتونة وحسمة بسم الله ماشاء الله بقي حاجة تانية، بس ثواني كان بيهتم بالجري جدا.
4. شوربة العدس: بصوا العدس بتاع المساجين دا بيقولك فيه كمية كبيرة من البروتينات والكربوهيدرات.
5. بطاطا مهروسة مع صدر دجاج مشوي أو مسلوق، فيهم كمية غذاء غير طبيعية جربوها وإدعولي.
6. الجبن القريش: ويحتوي كل قطعتين من الجبن المنزلي على 11.81 جرام من البروتين.
7. السمك: ممكن بقي تنزل تشتريلك 2 كليو سمك وتفضل تتسلي عليهم طول الإسبوع وبألف هنا يا كوتش.
8. يا شباب الجيم في أكل ميتعدش بس خلاصة الكلام ممكن تبحث في جوجل عن أكتر أكلات تحتوي علي بروتينات وتشوف الـ بتحبه ومتوفر بالنسبالك وتاكله.
ملحوظة: لو في أي حاجة عاوز تستفسر عنها ممكن تكتبها تحت في الكومنتات.
أفضل أكل قبل وبعد التمارين الرياضية
4/
5
Oleh
Hunter
