مجالات عمل قسم كهرباء باور

في موضوعنا السابق تحدثنا عن قسم ميكانيكا باور ومجالات عمله، وعرفناكم نبذة عن القسم ومجالات العمل فيه وازاي تقدر تستفيد من مجالاته الكتير والمتنوعه، والنهاردة جابين نتكلم معاكم في فرع موجود في قسم كهربا وهو فرع كهرباء باور وهنعرفكم ايه هو قسم كهرباء باور ومجالات عمله وعيوبه ومميزاته وازاي تقدر تنجح فيه.

قسم كهرباء باور (Power Electrical engineering)..

قسم كهرباء باور دا قسم بيهتم بدراسة وتطبيقات علوم قوي الكهرباء والمجالات الكهرومغناطيسية، وأصبح هذا المجال معروفاً في أواخر القرن التاسع عشر وذلك بعد انتشار البرقية ومحطات إمداد الطاقة، وتهتم هندسة كهرباء القوي بإنتاج ونقل وتحويل الطاقة الكهربائية عن طريق تصميم أجهزة كالمحولات والمولدات والمحركات الكهربائية.

مجالات العمل في قسم كهرباء باور:

1- مجال توليد الطاقة الكهربائية: ويكون ذلك في محطات توليد الكهرباء علي شتي انواعها زي محطات توليد الكهرباء بالماء كمحطات السد العالي ومحطات التوليد بالطاقة المتجددة كمحطات الطاقة الشمسية والرياح وغيرها.

2- مجال نقل الطاقة الكهربائية وتوزيعها: وطبعا وانت مسافر أي مكان بتلاقي اعمدة كهربية ومحولات توزيع الكهرباء ودا بيكون مسؤل عنه مهندس كهرباء باور فيقوم بإنتاج الكهرباء في محطات الإنتاج وونقلها وتوزيعها.

3- مجال التصميم: ودا بنشوفه بشكل مصغر عند كل واحد فينا فالبيت فبتلاقي عندك لوحة توزيع كهرباء مقسمة الشقة وكل جزء فيها ليه مفتاح تقدر تفصل عنه الكهرباء في اي لحظة، ودا بيكون موجود بتوسع في المصانع والشركات وعليه طلب كبير جدا في سوق العمل.

4- مجال المصانع: ودا بتلاقية لما بتروح اي مصنع او اي مكان بيحدث فيه عملية تصنيع هتلاقي فيه اجهزة وماكينات والاجهزة دي عشان تشتغل ويوصلها كهرباء لازم مهندس كهرباء باور يكون مسؤل عن حركة الأجهزة دي والتحكم فيها فالموضوع في ماكينات المصانع مش مجرد إمدادها بالتيار الكهربي ولكن لابد من متابعة الحركة ويكون المسؤل عنها مهندس كهرباء باور.

5- مجال الصيانة: وفي مجال الصيانة بيكون مهندس كهرباء القوي هو المسؤل الأول عن الموقع وما فيه من معدات كهربائية، كما يكون له دور أيضاً بصيانة المحولات والفواصل الكهربائية وباقي مكونات شبكة الكهرباء.

6- مجال التخطيط:
ودا بيظهر دوره بعمل الدراسات الفنية والتخطيطية لأي تحديث علي مولد ما لزيادة كفاءة المحطة أو لعلاج عطل به، وتتركز خبرات ذلك المجال بالجانب الفني أكثر منه بالجانب التنفيذي، وفي بعض الشركات يتم إختيار مهندسي الكهرباء المتميزين فنياً بالإدارات الأخرى ليعمل بإدارة التخطيط.

7- مجال شركات البترول والبتروكيماويات: معظم شركات البترول الكبيرة، وشركات تصنيع البتروكيماويات تحتاج إلى الطاقة الكهربائية بصورة كبيرة جدا او تعتمد عليها بشكل كامل، حيث أن العملية الإنتاجية بها تحوي الكثير من المحركات الكهربائية والتي تستهلك الكهرباء بصورة ضخمة، لذا نجد أن معظم تلك المصانع تقوم بتوليد الطاقة الكهربائية الخاصة بها من أجل تقليل التكاليف الباهظة في حالة إذا ما إتجهت تلك المصانع إلى شراء الكهرباء المولَّدة من محطات الكهرباء التابعة للحكومات.

مميزات قسم كهرباء باور:
من أهم مميزات قسم كهرباء باور سهولة الوظيفة فيها وكثرة مجالات العمل ودا كثير من الأقسام بتفتقده وإنك لما تكون متميز في قسم كهرباء باور هتلاقي نفسك مطلوب داخل وخارج مصر ودي حاجة كتير من الشباب بتدور عليها، وبردو قسم كهرباء القوي هو من الأقسام الدائمة بسبب الحاجة المستمرة إلي إيجاد طريقة جديدة وبديلة لإنتاج الكهرباء وتوزيعها وفي شركات عالمية موجودة بالفعل لإيجاد النماذج المتفوقة القادرة علي الإستفادة منها.

عيوب قسم كهرباء باور:
تقريبا القسم دا العيب الوحيد فيه الخطورة في العمل وهي نسبة قليلة بإذن الله إذا إتبعت تعليمات السلامة ولم تتهاونوا في تطبيقها وعيب صغير إن القسم أثناء فترة الدراسة بيكون في تحميل كبير عالطالب وهي ميزة وعيب لإنك بتعتمد علي نفسك في كتير من المعلومات ولكن بتثبت في دماغك وبتتعامل معاها.